शब्दांनी समृद्ध केलंय अवघं आयुष्य......!!!
तुलाही हवी अन मलाही हवी..
जगायास थोडी नवी पालवी..!!
खरे सांग मी डाव खेळू कसा..
तुझी पावसा रे नियत पाशवी .!!
जमेना तुझ्याशी मला भांडणे..
मुळातच तुझे बोलणे लाघवी..!!
मला चंद्र मागू नये तू सखे..
इथे भाकरी भेटणे थोरवी..!!
किती बोलती भडभडूनी मला..
तुझे डोरले अन तुझी जोडवी..!!
किती काळ गेला अजुन शोधतो..
कुठे भेटते जिंदगी वाजवी..!!
जुने टाळणे सोड आता तरी..
नवी राहते गोष्ट कुठवर नवी..??
-गणेश शिंदे,दुसरबीडकर..
९९७५७६७५३७
अग्नीस जोर यावा ऎसा समीर नाही...
देहास जाळण्याला,मी ही अधीर नाही.!!
आता तरी कळू दे,इजहार काळजाचे..
इन्कार ऎकण्याचा,कानास धीर नाही..!!
माझे मलाच कोडे,श्रावण कसा छळेना..
आता कळून आले,डोळ्यात नीर नाही..!!
दैवास दोष नाही,असलो जरी उपाशी..
ग्रीष्मातल्या झळांचे,कारण शिशीर नाही..!!
प्रेमात मी झुरावे,वाटे जरी मनाला.
पण कुंडलीत त्याने,लिहिलीच हीर नाही..!!
रचल्यात कैक गझला,कोणास याद नाही.
नंतर कळून आले,मी फैझ-मीर नाही..!!
-गणेश शिंदे
दुसरबिड,बुलडाणा
9975767537
वाटले आयुष्य हे काखेत होते..
शेवटी कळले वसाडे शेत होते..!!
हा व्यथांचा पावसाळा नेहमीचा..
वीज चमकावी तसे सुख येत होते..!!
जपत गेलो जिंदगीभर देह अवघा..
मग समजले 'यार हे तर प्रेत होते.'.!!
कोण 'मंबाजी' इथे आला असावा..?
केवढे काटे असे वाटेत होते...!!
वेळ गेला गोल करण्या भाकरीला..
अन निखारे तोवरी राखेत होते..!!
मन कधीचे फाटले..चिंध्या उडाल्या..
लोक देहाला दिलासा देत होते..!!
फोडुनी कातळ उगा का कोंब येतो..?
जीवनाचे हे खरे संकेत होते..!!
-गणेश शिंदे,दुसरबिडकर..
9975767537
रात्र माझी झोपतांना,पाहतो मी,
आसवांना पाहतांना,वाहतो मी!
तीच होती,राजवर्खी,ओळ छोटी,
काळजाला छेदतांना,साहतो मी!
चांदण्यांनी शापलेला,चंद्र माझा,
ग्रासलेल्या लोचनांनी,सांधतो मी!
रोज चालॆ,खेळ माझा,प्राक्तनाशी,
वादळांना वेग थोडा,मागतो मी!
का छळावे,यातनांनी,माणसाला?
वाद नाही,फक्त थोडा कावतो मी!
भास आणिक शोष आता,मोप झाला,
रे 'गणेशा' हात यांना,दावतो मी!!
@@@@@@@@@@@@@@@@@@@@@@@@@@@@@@
-निशिगंध(गणेश शिंदे,दुसरबिडकर)
:+9975767537
फुलपाखरावरी हा,कसला ठराव झाला,
फुलण्याअधीच त्याचा,चढताच भाव झाला!
जगण्यास लागती का,फसवेच ते बहाणे?
भलत्याच कारणांचा,मजला सराव झाला!
ढळतात कैक राती,असवे मनात ऒली,
दिवसास जाळण्याचा,नकलीच डाव झाला!
हळव्या क्षणास ऎसे,जपले जरी उराशी,
हळ्याच वेदनांचा,हळवाच घाव झाला!
वय वाढता कळाले,सरकार काय आहे,
फडतूस माकडांचा,नुसता जमाव झाला!
बघ रोखलाच नाही,हटवाद तू अधाशी,
परक्याच भाकरीशी,तुजला लगाव झाला!
असवास पूर येता,घर वाहते मनाचे,
हसण्यास काफरांना,हलकेच वाव झाला!
असतात रे 'गणेशा',असले नवाब येथे,
सरताज राखणारा,बघ 'बाजिराव' झाला!
÷÷÷÷÷÷÷÷÷÷÷÷÷÷÷÷÷÷÷÷÷÷÷÷÷÷÷÷÷÷÷÷÷÷÷÷÷÷÷÷÷÷
-निशिगंध(गणेश शिंदे,दुसरबिडकर©®)
:+919975767537
आरशाचा चेहराही,माणसाला टाळतो,
आतल्या खोट्या,मुजोरी,राक्षसाला टाळतो!!
येत-जाता आग लावी,जो शहाणा कैकदा,
पाहतो वरती नभा अन,पावसाला टाळतो!!
चोरट्याची वाच गाथा,बघ कळे मग काय ते,
रातचा हा खेळ म्हणोनी,तो दिसाला टाळतो!!
कर्ज घेता दोर येतो,अन गळ्याला लागतो,
याचसाठी हा कृषक त्या,कापसाला टाळतो!!
बापबेटे दौलतीने ,वेगळाले जाहले...,
यामुळे तर एक बाबा,वारसाला टाळतो!!
देशद्रोही वाढले बघ,घेच मित्रा,कार्य तू,
पाहतो मग देशसेवा,कोण साला टाळतो!!
'मी'पणाने अंत होतो,फार थोडे जाणती,
हा 'गणेशा'याच 'मी'च्या,साहसाला टाळतो!!
°°°°°°°°°°°°°°°°°°°°°°°°°°°°°°°°°°°°°°°°°°°°°°°°°°°°°°°°°°°°°°°°°°
-निशिगंध(गणेश शिंदे,दुसरबिडकर)
:+919975767537